官場技安 英語嶽曲同樣震撼
早前以一曲《忘不了你》技驚四座嘅食物及衞生局局長周一嶽，噚日再顯「歌神」本色，喺博愛醫院慈善餐舞會連唱兩首英文金曲，試圖為自己歌藝大平反，可惜佢呢個「官場技安」嘅封號似乎暫時都甩唔到身，因為有現場觀眾聽完周局長獻唱後，總結評語係「名不虛傳」。
由於政圈傳聞周局長擅長唱英文金曲多啲，所以唔少現場觀眾都洗耳恭聽，對周局長充滿期望。點知一曲《The Twelfth of Never》過後，有未敢回憶嘅聽眾已經覺得係咪嚟錯《歡樂滿東華》？局長粵曲腔口好鬼勁，好似將大家帶番三四十年代嘅日子。
可能一班博愛總理主席係粵曲迷，聽局長獻唱聽出耳油，一曲過後覺得唔夠喉，再捐60萬叫周局長「安哥」。結果非常陶醉於自己歌藝嘅周局長再開腔，獻唱《（Everything I Do） I Do It For You》，前後為博愛籌到120萬，真係一曲值千金，兩曲值萬金。
嶽嶽變官場技安 英文歌冧女( 2011-12-17 )
走音王改唱英文歌 周一嶽encore誓雪前恥
[轉載/Youtube] 食衞局局長周一嶽日前喺《歡樂滿東華》大展歌喉，一曲《忘不了你》令全城絕對忘不了，「官場技安」之名不脛而走，名震添馬艦，廣管局仲收到投訴㖭！局長見慣大場面，對於啲咁主觀嘅評論一於少理，下星期二晚encore，應邀出席博愛醫院慈善餐舞會再大展歌喉，登台獻唱經典英文金曲《Everything I do》同埋《The twelve of never》。熟悉周局長嘅官員或醫生同八方講，其實周局長歌藝係唔錯嘅，雖然唔係官場歌王，但喺醫學界芸芸唱家班之中，絕不失禮。《東華》當晚只係一時失準，因此今次博愛慈善Ball係佢大平反機會，誓要一雪前恥咁話。
一首歌籌一百萬
周局長打算獻唱嘅兩首歌，相信好多人耳熟能詳，尤其係《The twelve of never》，可以話係膾炙人口經典金曲，由Johnny Mathis主唱，唔少歌手都翻唱過，局長係番書仔，相信好易handle。上次局長唱一首歌就籌到100萬，今次唱足兩首，唔知善款會唔會都double呢？仁濟各位總理，要落力啲為局長打氣喎。
署長千金開金口
呢個Ball其實係慶祝博愛醫院成立92周年，除咗有局長獻唱，衞生署署長林秉恩愛女林子珊都會開金口幫忙籌款。署長千金原來都大有來頭，舊年已經喺同一場合與衞生防護中心總監曾浩輝合唱籌款，曾醫生彈琴伴奏，子珊唱咗《Dream a Little Dream of Me》、《Think of Me》等多首名曲，全場拍爛手掌，大家都估唔到署長千金原來係小巨肺，靚聲驚為天人。
子珊無繼承父業學醫行醫，在英國倫敦大學主修音樂，識彈琴作曲，仲不時唱choir，可惜佢回港後無投身樂壇，大家平日無緣聽到呢把靚聲。林子珊舊年同曾醫生合作，一開口就籌到50萬，唔知今年可唔可以有多啲進賬
0 comments:
Post a Comment