[娛樂] 蔡楓華苦等31年首踏紅館

蔡楓華首踏紅館計錯數( 2012-01-13 )
蔡楓華苦等31年首踏紅館


[轉載/Youtube] 蔡楓華去年脹爆復出歌壇，仲喺好友盧敏儀協助下喺九展開騷，令佢鹹魚翻生。蔡楓華今年4月會首踏紅館開「情陷紅館演唱會2012」，噚日佢喺黃埔搞記招，就冇盧敏儀份，有十幾位粉絲撐場，減磅唔少嘅蔡楓華話正節食同操弗，密謀操出六嚿腹肌。
蔡楓華話今次個唱優先訂票反應好，佢會爭取做四面台，希望到時可以容納一萬二千觀眾，佢話：「今次抱好大期望，上年去咗唔同地方登台，做好紅館就十全十美，到時會有勁歌熱舞。我練得好辛苦，今次乜都出晒。」

盼獲尊嚴
蔡楓華又話等足31年，終於有踏上紅館嘅機會：「希望得到名譽、地位同尊嚴，啲人睇完我，會引以為傲，今次多謝張生（張耀榮）支持。」蔡楓華去年完成九展個唱後傳出同盧敏儀交惡，蔡楓華承認大家各有各忙，所以少咗聯絡：「佢應該好忙，今次合作唔到，下次囉。」