[娛樂] 轟新城擺緋聞上枱 祖兒提阿詩發老脾

停乳 Gem　扯火 Joey　鬥懵( 2011-12-30 )
轟新城擺緋聞上枱　　祖兒提阿詩發老脾


[轉載/Youtube] 《新城勁爆頒獎禮2011》前晚派發今年首張樂壇成績表，一如勁爆宗旨豬肉獎人人有得分，全晚頒出百多個獎。陳奕迅（Eason）及容祖兒各得四獎成大贏家，不過新城DJ亦如常將歌手的戀情緋聞擺上枱，令祖兒及鄧紫棋（G.E.M.）大感不滿。

新城勁爆頒獎禮的賽果皆大歡喜，祖兒及Eason各奪四獎成大贏家。祖兒在慶功宴說沒厭倦出席頒獎禮，且不會對攞獎感到悶。問祖兒是否對何韻詩出現感最開心？她說：「咁咪乖，好多地方都開心，見到好多朋友。」

G.E.M.愛分豬肉
不過，對於新城DJ又將祖兒與阿詩的緋聞做話題，祖兒說：「都係用呢啲嚟搞氣氛，其實咁係最唔work，觀眾對呢啲橋段唔會覺得新鮮。」再問祖兒是否曾到阿詩家開派對？她語帶不悅說：「關你乜事？你唔係問我嘢咩？係咁問佢，一係你問番阿詩啦。問佢我係咪喺佢度，佢只係興起煮嘢食代替聖誕禮物，我係其中一個受惠者。我唔想答唔係，答係又大做文章，不如唔好講，好厭倦呢啲新聞。」而阿詩沒出席慶功宴。
有份被司儀將戀情擺上枱的鄧紫棋，覺得年年講同一話題很悶：「冇得介意，自己唔好講囉。」G.E.M.今年沒出碟卻獲女歌手獎，問她會否覺得是分豬肉？她說：「豬肉都要睇畀乜，總之新城由我出道以嚟都好支持我。」

台長拒澄清問題
如不計三個幕後獎，英皇和環球同得21個獎，新城台長朱明銳被問到填詞及監製獎是否計算入唱片公司，他迴避問題說：「唔好講呢個話題。」問朱明銳會否擔心有唱片公司不快？他反問：「邊間公司唔開心？黐線，冇唔開心。」他又透露沒獎的Amusic是放棄競逐，而旗下歌手則沒檔期出席。