[娛樂] 容祖兒閃現何韻詩竇 斷背情斷正

「紅」祖兒藏詩竇　斷背情斷正( 2011-12-27 )
祖兒閃現詩竇


[轉載/Youtube] 容祖兒同何韻詩呢對斷背緋聞好友近排想將關係地下化，但紙係包唔住火，噚日有好眼利嘅網友發現祖兒喺阿詩屋企嘅聖誕party出現。
聖誕節當晚阿詩約埋好友劉浩龍同陳文媛，仲有媽咪同前助手一家大細喺屋企開party，阿詩仲親手整大餐，咁辛苦為乜？咪為博紅顏一笑，當晚阿詩同劉浩龍食飽就玩網上好流行嘅blog TV直播，諗住同大家打招呼，點知個鏡頭影埋祖兒入鏡。着紅衫嘅祖兒發現自己入鏡，立即閃走，但為時已晚。
網友對呢單嘢議論紛紛，仲有fans留言叫祖兒做阿嫂。其實聖誕當晚祖兒去咗廣州演出，做完嘢約10點幾就坐車返香港，佢喺保母車上仲自拍咗張相放上網，見佢着紅衫咬住魷魚，原來衫都冇換就去咗阿詩屋企玩，咁又係，聖誕節梗係要同最親密嘅朋友一齊過啦。
新城大贏家
另外，祖兒聽日會去新城勁爆頒獎禮2011，據知佢同陳奕迅係大贏家，兩人各奪4大獎，包括新城全球勁爆女歌手獎。聽日仲會有唔少爆冷賽果，好似勁爆男歌手係張敬軒、梁漢文同張智霖，勁爆女歌手就有謝安琪、關心妍同鄧紫棋。黃貫中嘅熱爆歌《天與地》冇派台，但新城都增設獎項表揚。無綫會喺深夜重播頒獎禮，J2台會直播。