[娛樂] 馬時亨嫁女 名流到賀

肥馬嫁女　美主播變阿「茂」( 2011-12-27 )


[轉載/Youtube] 喺人人開心拆禮物嘅Boxing Day，前商務及經濟發展局局長馬時亨噚日就拆咗份「榮升外父」嘅禮物，因為佢嘅心肝寶貝女馬露明Christine同廣華醫院放射診斷科醫生劉仲恆Kevin正式拉埋天窗。肥馬已即時向阿女開價「三個」，希望做三任公公咁話；但阿女以一句「順其自然，等主安排」回敬老竇。

肥馬打高球考驗女婿
30歲嘅Christine係JEMS教育中心創辦人，同老公劉仲恆同樣都係30歲。原來佢兩個喺兩年前先相識，拍拖時間只有一年多。噚日佢兩家人喺君悅酒店筵開40多席、宴請500多位親朋戚友。馬露明妹妹馬露玲仲做埋伴娘，同家姐一齊分享喜悅。
周啟邦公子周國豐係馬露明好朋友，佢噚日大爆呢對新人幾乎係一見鍾情，識咗唔夠一個月，Kevin就已經求婚，認真情訂今生。Kevin就憶述兩年前喺JEMS教育中心同Christine認識經過，承認交往時已視對方為結婚對象，自爆問過準外父同外母意見後先至求婚，仲要通過「打高爾夫球」呢關，正式通過肥馬測試。
肥馬不諱言恨抱龍B，仲話想響應煲呔呼籲，希望阿女生夠三個。Kevin同Christine就話生BB係要等主嘅安排，一切順其自然。自從阿女4月訂婚以來8個月，肥馬話流口水都流濕咗8條毛巾喎，等咗噚日呢個大日子好耐。表弟曾志偉雖然身在雲南拍戲無法出席，由佢個女曾寶儀代老竇祝賀，肥馬話唔介意，兩老表邊計得咁多。

伏明霞仔女做埋花童
肥馬人面廣，噚日晚宴星光熠熠。除咗李國寶、王冬勝、柯清輝、恒基主席「四叔」李兆基等，身為肥馬鄰居嘅李柱銘都有同太太結伴到賀。前財爺梁錦松同伏明霞兩夫婦認真唔話得，除咗自己人到禮到，一對仔女仲做花童。