[時事] 1968印尼餐廳 咖喱雞飯 樓上舖三折

＄ 240咖喱雞飯　樓上舖三折( 2012-01-31 )
1968印尼餐廳 上樓望升呢


[轉載/Youtube] 想食碗米芝蓮級數嘅印尼咖喱雞飯，係加租加到癲嘅銅鑼灣黃金地段，定價要高到240蚊。經營半個世紀嘅禮頓道1968印尼餐廳，難敵業主瘋狂加租三倍，被迫搬到中環樓上舖。由地舖搬到樓上，係就係要行多兩步，但可以殺到入中環，招牌印尼咖喱雞飯仲可以keep住88蚊呢個價位。第四代傳人Hudson話，搬新舖，顧客就唔使食貴嘢。

地踎風格　廚師原班人馬
連續兩年入選米芝蓮推介食肆嘅禮頓道印尼餐廳，噚日正式搬到皇后大道中139號嘅新店，重新啟業。鎮店之寶係Hudson太公早於1920年喺印尼做街頭熟食小販嘅仿製三輪車。Hudson同兩個孖生細路搭晒膊頭，影番張相留念。三兄弟將樓上舖設計成好有印尼街頭地踎風格。
佢話中環樓上舖嘅月租，同禮頓道舊舖未加租前差唔多，大約係12萬元。家族生意由太公傳到阿爺喺泗水開餐廳，阿爸1968年移居香港，最初喺銅鑼灣恩平道開舖，再搬到禮頓道28號。當年業主同樣做飲食，轉手租畀阿爸經營。其間曾經生意唔好，業主好有人情味，租金可以拖住先。但自從業主將舖位出售，新業主舊年10月將租金大幅加到30萬。
Hudson話，全家人同親戚都住喺銅鑼灣，對銅鑼灣好有感情。三兄弟諗過喺跑馬地或天后搵新舖，點知租金同樣貴到癲。最後搵到中環樓上舖重新打拼。唯一不變喺所有印尼廚師，全部都係老店嘅原班人馬，保住米芝蓮質素。Hudson最大心願，係樓上舖能再吸引到米芝蓮品評，佢有信心新舖可以升呢，打入米芝蓮星級榜。